باغیشلایین ها
آیدین آراز
…باغیشلایین ها
اودقونورام سیزین اوکسیژئنی
گئجه لرینیزده یاتیرام
باغیشلایین ها...
اویانیرام دا هردن
ایزین سیز- ایزین سیز،یوخو گؤروره م
گیزلتمه ییم یاخشی دئیل
سئویره م ده هردن
یاغیشلایین ها،اؤزوده چوخ
اودقونورام سیزین اوکسیژنی
بللی دیر بونو یازمایا دا بیلرسینیز
آی ایشیغی یاخیلیر اوتاغیما
آیی بوراخیرمیسینیز اوتاغیما؟
آییما توخونمایین لوتفن
منه ائله جه باخمایین لوتفن!
منیم ده آنام وار ،باغیشلایین ها....
او قدر سئویره....... م
ایلین ۳۶۵ گونونو ده قورخورام اؤله
گوندوزلرینیز تیخیلیر بوغازیما
آز قالیر بوغولام
اؤسکورو.-.-.- ره م - باغیشلایین ها
گؤزلریم ایزین سیز گؤرور بیر شئیلری
دیلیم ایزین سیز سؤیله ییر
گیزلتمه ییره م
اللریم ده یازیر
یازیرام داااااا هه...
آی ایشیغی اوتاغیما ووران گئجه لرده
اؤسکوروره‌م
اودقونورام
سئویره‌م
یازیلاریمی، آی ایشیغینی، آنامی
بللی‌دیر،یازمایا بیلرسینیز
بللی‌دیر- بونو اوخویا بیلرسینیز
گؤزلریمده‌ن
باغیشلایین ها.......
1384
یاساق سؤزجوزوم شعر توپلوسون‌دان
حرف لر / کلمه لر / شعر / یاغیش