یئنی
ایلین باشلانیشیندا آرزولار
من
آرزو ائدیرم بعضی آرزولاریم اوشاق‌یانا
اولموش اولسادا بئله.....
آرزو
ائدیرم ژاپن سونامی‌سی‌نین ایتگین‌لری دیری تاپیلسین‌لار.چون اونلار اذیت‌سیز
انسان‌دیرلار و تخمینن آرالاریندا نم نه‌قدر هایکو شاعری وار.هایکو شاعری‌لری بو
باهاری گؤرمه‌لی‌دیرلر . گیلاس چیچکلری‌نی یازمالی‌دیرلار هایکولاریندا.
آرزو
ائدیرم لیبی ده اؤلن انسانلارین ساققالینا گوله بیلمسین قذافی و اونون جیره
خوارلاری.و بونا گؤره لیبی‌ده انقلاب‌چی‌لار اودمالی‌دیرلار حتی بو بیر اویون دا
اولسا بئله.
آرزو
ائدیرم بوتون دونیا دیکتاتورلاری بونا اینانسین‌لار کی دونیا دئیشیلمه‌مکده و داها
اونلاری تحمل ائده بیلمیر.آدام اؤلدورمه‌دن حکومت‌لری ملت‌لرینه تاپشیرسینـلار.و
بو آرزومون سونوندا دیکتاتورلارین جئنتلمنی حسنی مبارک دن صمیم قلب دن تشککور
ائدیرم.
آرزو
ائدیرم ایشچی‌لرین آیلیق‌لاری چوخالسین
او قدر کی کتاب اوخویوب سینمایا گئتمه‌یه اؤنم وئره بیلسین لر و اوشاقلارینی
موسیقی کلاس‌لارینا قویا بیلسین‌لر.
آرزو
ائدیرم گنج‌لر و یاشلی آداملار دا اوشاق‌لار کیمی حایات‌دان لذت آلا بیلسین‌لر.همی
ده دئپرسیون(افسردگی)سونامی‌سیندا بوغولماسین‌لار.و تئزلیک‌له فلوکستین،نوروتریپ‌تیرین،کلرودیاپوکساید
و باشقا آدینی بیلمه‌دییم آنتی دئپرسیون
قرص‌لارینی آتماق‌دان خلاص اولسون‌لار.
آرزو
ائدیرم بو ایلین ایچینده شعر،اؤیکو و یا باشقا کیتاب‌لاری چیخارتماق آرزوسوندا
اولان یازارلار مجوز آلا بیلیب، یایین ائوی تاپا بیلیب کتابلارینی چیخاردا بیلسین‌لر.فیلم
دوزلندن‌لریسه سئودیک‌لری فیلمی دوزلدیب سئودیک‌لری فیلم‌لره باخا بیلسین‌لر.
آرزو
ائدیرم انسان لار سئوه بیلسین‌لر و سئوگی‌نین دادینی بیلمدن اؤلمه‌سین‌لر چون
حئییف‌دیر. هر حالدا بیر اوچاق قضاسی،بیر سئیل،بیر زلزله و یا باشقا حادیثه‌لر
انسان‌دان بو سئومک قابلیتینی آلا بیلر.
آروزو
ائدیرم..........
آروزو
ائدیرم..........
آرزو
ائدیرم و آرزو ائدیرم یئنی دن چون اؤلمک نفس چکمه‌مک دئییل اؤلمک آرزو ائده بیلمه‌مک‌دیر.آرزولار
حتی اوزاق‌دا اولسالار بیر کؤرپودولر انسان قالماق اوچون. من اوستوندن کئچیرم بو
کؤرپولرین و حایات داوام ائله‌ییر.آرزولار اؤلسه‌لر حایات داوام ائده بیلمه‌یه‌جک
بو آخارلیقدا.
حرف لر / کلمه لر / شعر / یاغیش