زنگ آچدیم
آیدین آراز
سلام
سوسوزودوم
دئدیم سیسینی ائشیدیم
سسیندن سرین سو‌سسی گلیر
بورا سمیرسیزدیر
سسینده قان وار-ایسسی
بو سویوق تنلی جسده
سسینده بیر اوشاغی تعمید ائتمک اولور
سسینده بیرآزجا آذان ،بیرآزجا کلیسا ناقوسو وار
بورا سمیرسیزدیر
زنگ ووردوم سسینی ائشیدیم
نه سؤزو ؟!سؤز یوخ!
دئدیم مثلا دییه‌‌سن نه خبر فیلان؟!
دئییم هر نه یاخجی‌دیر تکجه بیرآز داریخیرام
و دانیشاسان سن بیلمه‌دن آزالسین داریخمام
یوخ،نه شعر،نه فلسفه و نه باشقا گؤبود شئی‌لر
باهالیق فیلان دا ایلگیلندیرمیز بیزی
سسین تئلفون آرخاسیندا تؤکولسون ایچیمه دئدیم
سسینده امودلاندیریجی فرکانس‌لار وار
اینتحاری یوباندیران
کابوسو پوزان فرکانس‌لار
سوکوتومدا بیر کؤرپه آغلاییر
سسین آوودور
دئدیم زنگ وروم سسینی ائشیدیم
آنجاق بیر آیا یاخین‌دیر
یابانجی بیر قادین دئییر:
"سؤنوک‌دور" سسین
اوتاغیمین چراغی تک سؤنوک
.
سسلی فایلینی دینله ییب ائشیدمک اوچون بورانی تیکلایین
حرف لر / کلمه لر / شعر / یاغیش